БИШКЕК, 16-авг. — Sputnik. Кыргызстанга ташып келинген буудайдын басымдуу бөлүгү Россиядан, ал эми ун Казакстандан сатып алынат. Бул туурасында Улуттук статистика комитетинин маалыматында айтылган.
Эске салсак, Кыргызстан өзүн-өзү дан менен толук камсыздай албайт, андыктан ун менен буудайды импорттоого туура келет.
Буудай тууралуу маалымат
Үстүбүздөгү жылдын биринчи жарымында Кыргызстан дандын мындай түрүнөн 162,3 миң тонна сатып алган:
Россиядан — 157 963,6 тонна;
Казакстандан — 4 288,7 тонна;
Түркиядан — 0,2 тонна.
Демек, ташып келинген буудайдын дээрлик 100 пайызы Евразия экономикалык биримдигиндеги өлкөлөргө туура келет.
Ун тууралуу маалымат
Январь-июнь айларында Кыргызстан 13,7 миң тонна буудай жана буудай, кара буудай унун импорттоду. Сатуучу өлкөлөр:
Казакстан — 12 577,9 тонна;
Россия — 1 118,7 тонна;
Түштүк Корея — 0,2 тонна.
Ун боюнча кырдаал дагы буудайга окшоп, дээрлик баары ЕАЭБ өлкөлөрүнөн алынары белгилүү болгон.