БИШКЕК, 15-авг. — Sputnik. Президент Садыр Жапаров Кыргызстанга иш сапары менен келген Өзбекстандын премьер-министри Абдулла Ариповду кабыл алганын өлкө башчынын маалымат кызматы билдирди.
Жолугушууда Кыргызстан менен Өзбекстандын ортосундагы саясий, соода-экономикалык, маданий-гуманитардык жана эки тарапты тең кызыктырган башка чөйрөлөрдө кызматташууну мындан ары кеңейтүү жана тереңдетүү боюнча пикир алышуу болгону айтылды.
Жапаров кыргыз-өзбек мамилелеринде эки тараптуу кызматташуунун дээрлик бардык багыттарында чоң өзгөрүүлөр болгонун айтып, мындай биргелешкен ийгиликтерде Өзбекстандын президенти Шавкат Мирзиёевдин салымын баса белгиледи.
Өз кезегинде Арипов өлкө башчысы Шавкат Мирзиёевдин дубай саламын айтып, Садыр Жапаров мамлекет жетекчисин президенттик шайлоодогу ийгиликтүү жеңиши менен биринчилерден болуп куттуктаганын белгиледи.
"Муну менен катар Өзбекстандын премьери Мирзиёевдин Кыргызстанга болгон мамлекеттик сапарында кабыл алынган тарыхый чечимдерге басым жасады. Анын ичинде, кыргыз-өзбек мамлекеттик чек арасын делимитациялоо жана демаркациялоо процесси аяктаганына токтолду", — деп айтылат маалыматта.
Баарлашуунун жүрүшүндө Арипов Өзбекстан боордош Кыргызстандын жетишкен ийгиликтерине, өлкө экономикасынын туруктуу өнүгүшүнө чын дилинен кубанарын айтып, экологиялык заманбап Асман шаарынын курулушунун башталышын мамлекеттин ийгиликтүү өнүгүүсүнүн айкын символу катары сыпаттады.
Жолугушууда тараптар эки элдин бакубатчылыгын жана бир туугандык байланыштарын чыңдоого багытталган биргелешкен мерчемдер менен долбоорлорду ишке ашырууга өзгөчө көңүл бурушту.
Эскерте кетсек, коңшу өлкөнүн өкмөт башчысы Кыргызстанга Чолпон-Атада өтө турган кыргыз-өзбек өкмөттөр аралык эки тараптуу кызматташуу боюнча биргелешкен комиссиянын 10-жыйынына катышуу үчүн келди.