Чүй облусу боюнча жерди мыйзамдаштыруу боюнча жалпы 38 миңден ашык арыз түшүп, бүгүнкү күндө алардын 20 миңден ашыгы ийгиликтүү каралып бүттү. Бул тууралуу Нурзаман Адашпасов Sputnik Кыргызстан радиосунун эфиринде маек куруп жатып билдирди.
Анын айтымында, тиешелүү тараптар калган 18 миңден ашык тургундун арызынын үстүнөн иш алып барууда.
"Баарыбызга маалым болгондой, буга чейин айрым жер тилкелери мыйзамсыз жол менен 3-4 кишиге сатылып кеткен. Бул боюнча биздин облустан жалпы 38 миңден ашык адамдан арыз түшкөн. Тиешелүү тараптар иш алып барып, учурда 20 миңден ашык арыз ийгиликтүү каралып бүттү. Бул — 20 миңден ашуун жарандын жери боюнча алдыда талаш маселе жаралбайт дегендик. Калган арыздар боюнча да иштеп жатабыз. Бир эле жер канча көп кишиге сатылып кеткен болсо, териштирүү ишине да ошончолук көп убакыт кетип жатат. Жакында 20 миңден ашык тургун сатып алган жери боюнча кызыл китепке ээ болот", — деди Адашпасов.
Ал жерди мыйзамсыз саткандар боюнча укук коргоочулар да иш алып барып жатканын кошумчалады.