БИШКЕК, 13-авг. — Sputnik. Президент Садыр Жапаров Ысык-Көл районунун Булан-Соготту айылындагы ат майданында көк бөрү боюнча клубдар аралык биринчи дүйнө кубогун ачты. Бул тууралуу өлкө башчынын маалымат кызматы кабарлады.
Жапаров кыргыздардын ата-бабалары бейиштей көз талдырган табият менен кошо жүрөк туйлатып, кан кызыткан улуттук оюндарды, улутту улут кылып сактап келаткан нарк-насилди аманат кылып калтырып кеткенин белгилеген.
Президент көк бөрү кыргыз элинин байыртадан ойнолуп келе жаткан улуттук оюндарынын бири экенин белгилеген.
"Кыргызда "Көк бөрү — бул эрендердин эр оюну" деп жөн жеринен айтылып калган эмес. Бул эрендердин эр оюну улакчыдан чапчаңдыкты, намыска бектикти, карандай күчтү талап кылат. Демек, көк бөрү эрки күчтүү, эч нерседен жалтанбаган, эл-жерин коргоого ар дайым даяр турган жоокерлерди өстүрүп чыгат", — деген Жапаров.
Ал көк бөрү оюну жүрөгүндө жалыны бар жаштарды команда менен иштөөгө, учуру келгенде чукул чечим кабыл ала билүүгө, чыдамкайлыкка, эрктүүлүккө, атуулдукка тарбиялай турганын айткан.
Мамлекет башчы көк бөрү оюну Бүткүл дүйнөлүк көчмөндөр оюндарынын программасына кирип, эл аралык деңгээлдеги спорттун түрү экенин тастыктаганын, оюндун географиясы кеңейгенин эске салды.
Ошондой эле бүгүнкү оюндар эл-журтка, меймандарга эстен кеткис маанай гана тартуулабастан, эл аралык ынтымакты бекемдөөгө дагы чоң салымын кошот деген ишеничин билдирген.
Оюн Чолпон-Ата шаарынын ат майданында 13-20-август күндөрү өтөт. Мелдешке Кыргызстан, Казакстан, Өзбекстан, АКШ, Түркия жана Россия командаларынын келиши күтүлүүдө.