Электр кыймылдаткычтары бар автотранспорт каражаттарын импортоого тарифтик жеңилдиктер берилет. Бул тууралуу Нурсултан Ашымбеков Sputnik Кыргызстан радиосунун эфиринде маек куруп жатып билдирди.
Анын айтымында, негизги максат ири шаарлардагы автоунаадан чыккан зыяндуу заттарды азайтуу жана экологиялык абалды жакшыртуу, инновациялык технологияларды өнүктүрүү болуп саналат.
"2022-жылдын 17-мартында "Электр кыймылдаткычтары бар автотранспорт каражаттарынын айрым түрлөрү боюнча Бажы бирлигинин комиссиясынын жана ЕЭК кеңешинин айрым чечимдерине өзгөртүүлөрдү киргизүү жөнүндө" ЕЭК кеңешинин чечими кабыл алынган. Бул чечим менен өлкөгө импорттолуучу электрмобилдердин айрым түрлөрүн (8703 80 000 2 TH СЭА коду боюнча) ташып келгендер бажы алымдарын төлөөдөн бошотулган. Алсак, 2022-жылы беш миң жана 2023-жылга 10 миң даана бирдик унаага жеӊилдик берилген. Бул жеңилдиктин мөөнөтүн дагы эки жылга узартуу үчүн Экономика министрлиги Евразия экономикалык комиссиясынын кеңешине сунуш киргизип колдоо тапты. Ага ылайык, 2024-жылга 15 миң жана 2025-жылга 20 миң темир тулпарга квота берилип, электромобиль бажы алымдарын төлөөдөн бошотулмай болду", — деди Ашымбеков.
Ал жеӊилдиктер боюнча 2021-жылы өлкөдө 205, 2022-жылы 1550 электромобиль алып келингенин, учурда унааларды кубаттоочу 50дөн ашык станция бар экенин кошумчалады.