Россиядагы мамлекеттик жана муниципалдык кызматкерлердин окуу жайы, жөнөкөй тил менен айтканда "губернаторлор мектеби" былтыр алгачкы ирет КМШ мамлекеттеринен да окууга тартты. Анда конкурстук негизде ар бир өлкөдөн 10дон талапкер тандап алынды. Бул тууралуу Токтосун Султанов Sputnik Кыргызстан радиосуна маек куруп жатып билдирди.
Анын айтымында, окутуу акысыз жүргүзүлгөн.
"Бул окуу жайдан окуп келүү максаты менде мурдараак эле пайда болгон. Күчтүү мектеп экенин билчүмүн. Бирок КМШ мамлекеттеринин жетекчи кызматкерлери үчүн окуу жай былтыртан баштап гана эшигин ачты. Каалоочулар көп болду, Кыргызстандан өткөн 10 талапкердин ичинен экөө аял, калганы эркектер болдук. Окутуу беш локацияда жүрдү. Бул Москва шаары, онлайн билим алуу, Нижний Новгород, Казань шаарында жана жогорку мектептин өзүнүн бир базасында окуп келдик. Бизге күчтүү спикерлер тартылды. Алар: дүйнөлүк деңгээлдеги иш-чараларды уюштуруп жүргөн менеджерлер, атактуу саясатчылар, күчтүү бизнесмендер, банкирлер жана белгилүү профессорлор, илим адамдары. Долбоор абдан жандуу өттү, бир жылдык окууну кантип жыйынтыктап калганыбызды байкабай калдык. Кызыктуу лекциялар иш тажрыйбалары менен айкалышып, жерине барып көрүп, таанышып жаттык. Окуу процессинин 70 пайызы тажрыйба негизинде өттү. Кыргызстандан барган топ бизге да ушундай курс ачуу зарылдыгын, аймактагы жетекчи кызматкерлерди тартып окутуу керектигин ойлоп кайттык. Мындан сырткары, дипломдук иш катары топторго бөлүнүп бир теманы алып чыгуу керек болчу, мен мүчө болгон топ сейрек кездешкен оорулар менен күрөшүү борборун КМШ аймагына ачуу боюнча өзүбүздүн теориялык ишибизди көрсөттүк. Келечекте колдоо таап, ал да ишке ашып калышы мүмкүн", — деди Султанов.
Ал аталган жогорку мектептен мамлекеттик, муниципалдык кызматкерлерден сырткары ишкерлер да окуй аларын кошумчалады.