БИШКЕК, 9-авг. — Sputnik. Ысык-Көлдүн суусу 10 жылдын ичинде жээктен дээрлик бир метрге тартылды. Бул тууралуу Жаратылыш ресурстары, экология жана техникалык көзөмөл министрлигине караштуу Суу жана жер ресурстары башкармалыгынын жетекчиси Таалай Далбаев билдирди.
Ал Sputnik Кыргызстан агенттигинин маалымат борборунда өткөн брифингге катышты.
"2011-жылдан 2021-жылга чейин Ысык-Көлдүн суусу жээктен 95 сантиметрге тартылды. Буга кичи дарыялардын азайышы жана ысыктан улам суунун бууланышы себеп болууда. Кыргызстан боюнча кичи дарыялар соолуп калганын байкоого болот. Жай бою дээрлик жаан жааган жок. Ысык-Көлдүн аймагында жалпы жонунан 156 дарыя бар. Бирок алардын 30у гана Ысык-Көлгө куюлат. Анткени калгандары сугатка колдонулат", — деди Далбаев.
Ал бул көйгөйдү жоюу үчүн сууну үнөмдөөчү технологияларды киргизүү, суу аз ичкен өсүмдүктөрдү тигүү жана тамчылатып сугарууга өтүү зарылдыгын кошумчалады.