БИШКЕК, 9-авг. — Sputnik. Президент Садыр Жапаров Кыргызстан санкцияларды айланып өтүүгө көмөктөшүп жатат деген АКШ сенаторуна жооп берди.
Өлкө башчы "Кабар" агенттигине берген маегинде Кыргызстан батыштын санкцияларын айланып өтүүгө жардам берип жатат деп шектенүүгө эч кандай негиз жоктугун билдирди.
"Россия менен Кытай кичинекей Кыргызстанга көз каранды эмес. Өздөрү бири-бирине кошуна өлкөлөр, 4000 чакырым чек ара тилкеси бар. Россия кааласа деңиз же темир жол аркылуу эшелон-эшелон же баржа-баржа кылып каалаган товарын ташып алат. Ооба, кыргызстандык компания дрон алып бара жаткан жеринен Казакстандан кармалды. Ал дрондор айыл чарба багытында болчу деп түшүндүрдү. Ошентсе да биз дрон жана учкучсуз аппараттарды өткөрбөй жатабыз. Менин атыма сенатор эле эмес, төбөсү көрүнгөн чоңдордун баарынан эле андай каттар көп келип турат", — деди Жапаров.
Президент эптеп эле шылтоо таап өлкөгө кысым көрсөтүү аракети болуп жатканын белгилеген.
"Муну мен жөн гана бир шылтоо таап, Кыргызстанга кысым кылып, өздөрү жакка тартуу деп билем. Андайга жол бербейбиз, биз эгемендүү мамлекетпиз. Бардык өлкөлөр менен бирдей мамиледе болобуз. Көп векторлуу саясат жүргүзөбүз. Россия — Украина маселесинин башталышында эле нейтралдуубуз деген позициябызды билдиргенбиз. Ошондон жазбайбыз. Биз позициябызды бир тарабына өзгөртүп койсок эле ошол тарабы жеңип кетпейт. Бизден көз каранды эмес", — деди Жапаров.
Белгилей кетсек, бүгүн ЖМКларга америкалык сенатор Роберт Менендес мамлекет башчыга Россияга каршы санкцияларды дыкат сактоо өтүнүчү менен кат жөнөткөнү маалым болгон.