БИШКЕК, 5-авг. — Sputnik. Кыргызстанда залкар жазуучу Чыңгыз Айтматовдун 95 жылдыгына арналган "Борбор Азия жаштар форуму" өтөт. Бул тууралуу Маданият, маалымат, спорт жана жаштар саясаты министрлиги билдирди.
Маалыматка ылайык, аталган иш-чара 10-11-август күндөрү Чолпон-Ата шаарында болмокчу. Борбор Азия жаштарынын башын бириктирген форумдун максаты жаштардын жана жалпы эле коомдун өнүгүүсүнө шарт түзгөн жаратман идея, тажрыйба жана билим алмашуу аянтчасын түзүү болуп саналат.
Ага Борбор Азия өлкөлөрүнөн келген жаш делегаттар, көрүнүктүү жаш лидерлер, активисттер, мамлекеттик жана бейөкмөт уюмдардын өкүлдөрү катышат.
Форум алты панелдик сессия менен өтөт:
"Кылым тогошуудагы маданият" — маданияттын азыркы дүйнөдөгү ролу жана жаштардын өздүгүн, улуттук аң-сезимин калыптандыруудагы мааниси;
"Креативдүү индустрия" — аймактардагы креативдүү тармактардын мүмкүнчүлүктөрүн жана келечегин, ошондой эле алардын экономикага жана социалдык-маданий ар түрдүүлүккө кошкон салымы;
"Айыл чарбасындагы инновациялар" — жаштардын катышуусу менен айыл чарбасын өнүктүрүүгө карата заманбап технологияларды жана мамилелерди, алардын азык-түлүк коопсуздугун камсыз кылуудагы ролу;
"БУУ 2250" (Жаштар, тынчтык жана коопсуздук боюнча ресурстар, 2015-жылы кабыл алынган) резолюциясы боюнча сунуштамаларды иштеп чыгуу — жаштардын коомдук жана саясий турмушка активдүү катышуусун колдоого багытталган конструктивдүү сунуштамаларды түзүү;
"Ыктыярчылар — коомдун тиреги" — коомду өнүктүрүүдө ыктыярчылардын маанилүү ролун талкуулоо жана демилгелүү жаштардын алдыңкы тажрыйбалары менен алмашуу;
"Жаш мамлекеттик кызматкерлер — келечекке жаңы көз караш" — жаштардын мамлекеттик кызматка катышуусунун жана алардын өлкөнүн динамикалуу келечегине кошкон салымынын маанилүүлүгү.