Бизде иштелип чыккан Санарип кодекси азырынча башка мамлекеттерде жок документ болуп эсептелет. Максаты санариптик өнүгүү доорунда анын алкагында жүргүзүлүүчү карым-катнаштарга ыңгайлуу шарт түзүү болуп саналат. Бул тууралуу Индира Шаршенова Sputnik Кыргызстан радиосуна маек куруп жатып билдирди.
Анын айтымында, иштелип чыккан мыйзам долбоору учурда министрликтин сайтына коомдук талкууга коюлду.
"Санарип кодексин иштеп чыгуу мезгил талабы эле. Аны санариптик көндүмдөрдү колдонуу эрежелери десек да болот. Азыр бардык тармактар санариптешип жаткан соң бул багытта да өзүнчө мыйзам керек болору көрүнүп турат. Андыктан биз мына ушул документти иштеп чыктык. Ооба, бул оор документ, ошол эле учурда кызыктуу дагы. Ал жалпы жана атайын бөлүктөн турат. Коомчулукка документ менен таанышарда алгач анын ылдый жагына жайгашкан сөздүктү окуп чыгууну сунуштайм. Ошондо түшүнүктүү болот. Анткени документте IT терминдери көп. Ошондой эле талкууга активдүү катышып, ой-пикир билдиргендер көп болсо жакшы болмок. Күздө Жогорку Кеңеш эс алуудан келген соң эл өкүлдөрү да өз кошумча-алымчаларын айтып, коомчулук менен бирге бул документти ийине жеткиребиз деп ойлойм", — деди Шаршенова.
Ал документтин спецификалык өзгөчөлүгүнөн улам аны иштеп чыгууда бир нече киши эмгектенип, ар кайсы бөлүгү ар тилде жазылып, которулганын кошумчалады.