БИШКЕК, 2-авг. — Sputnik. Тердегенде жыттын чыгышы ден соолуктагы кээ бир көйгөйлөрдөн кабар берет. Бул тууралуу Sputnik радиосуна эндокринолог Зухра Павлова билдирип, кенен түшүндүрүп берди.
Адистин айтымында, тердөө – табигый процесс, ал адамды өтө катуу ысып кетүүдөн коргойт. Саламаттыгында көйгөйү жок адам тердегенде эч кандай жыт чыкпайт.
"Кайсы бир илдеттерден жабыркаган адамдардан башкача жыт чыгат. Аял тердегенден кийинки жыты өзгөрүп, ачуу болуп калса андрогендин (эркектердеги жыныс гормону) деңгээли өсүп кеткен болот. Эркектер да өздөрүнүн жыты өзгөргөнүн байкаган болсо, анда гормоналдык баланс бузулган болушу мүмкүн. Дарыгерге кайрылып, анализ тапшыруу сунушталат", — деди Павлова.
Ал терден жагымсыз жыттын чыгышынын дагы бир себеби грибок экендигин белгиледи. Колтукта грибок инфекциялары болсо тер жөн бөлүнбөй жыт менен чыга баштайт. Мындайда адамдан ачуу жыт келет, бул учурда да дарыгерге кайрылуу зарыл.
Эндокринолог адамдын жытынын өзгөрүшүнө диабет оорусу да себеп болушу мүмкүн экендигине токтолду.
"Диабеттин биринчи тибинде кандагы глюкозанын деңгээли өтө жогору болот, мындайда организм аны иштете албай калат, себеби инсулин жетишпейт. Тер бөйрөк, ичеги, боор организмдеги негативдердин баарын чыгарууга күчү жетпей жаткан учурда аларды чыгаруучу дагы бир вариант болуп саналат. Эгерде организмде глюкоза өтө көп болсо, ал да тер түтүкчөлөрү аркылуу чыгат. Бул глюкоза сорбитолго айланган учурда бейтаптан таттуу сыяктуу жыт чыккандай болот", — деп түшүндүрдү Павлова.