БИШКЕК, 31-июл. — Sputnik. УКМК коррупция жана башка кылмыштар боюнча айыпталган адамдарды камактан бошотуу учурлары боюнча социалдык тармактарда эки ача ойлор жаралып жатканын айтып, түшүндүрмө берди.
Маалыматка ылайык, УКМКга кылмыш иштери боюнча соттолуучуларга карата кылмыш-жаза мыйзамдарында белгиленген тартипте, кылмыштардын оордугуна жараша, тергөөчүнүн өтүнүчү менен сот камакка алуу түрүндөгү бөгөт коюу чарасын тандайт. Белгиленген максаттардын ишке ашышына жараша, анын ичинде мамлекетке келтирилген зыяндын ордун толук толтуруу, айыпкерлердин тергөө менен кызматташуусу жана кылмыштын бетин ачууга, башка адамдарды кылмыш жоопкерчилигине тартууга көмөктөшүүчү көрсөтмөлөрдү берүүсү эске алынат. Ошондой эле оорусу болсо тергөө органдары тарабынан айрым учурларда сотко баш коргоо чарасын үй камагына өзгөртүү же сыртка кетпөө жөнүндө тил каты менен чыгаруу өтүнүчү берилет.
"Баш коргоо чарасын өзгөртүү жана айыпталуучуларды камактан бошотуу фактысы аларды эч кандай кылмыш жоопкерчилигинен бошотпойт. Ал эми кылмыш иштери соттук кароонун жыйынтыгы боюнча өкүм чыгарган сот органдарына жөнөтүү менен аягына чыгарылат. Мурда маалымдалгандай, УКМК тарабынан коррупцияга каршы күрөшүү иши улантылып, ага тиешеси бар адамдар мыйзамдын чегинде жоопкерчиликке тартылат", — деп айтылат маалыматта.
Белгилей кетсек, буга чейин УКМК төрагасы Камчыбек Ташиев коррупция менен күрөшүүнүн экинчи этабында кармалгандар мурдагыдай кайра чыгарылбай турганын, эми катуу чаралар колдонуларын айткан.