Акыркы үч жылда эркин күрөштө ири ийгиликтер башталды. 23 жашка чейинкилер арасында дүйнөнүн эки чемпиону чыкты, чоңдор арасында континенталдык биринчиликтерден, дүйнө кубокторунан байгелүү орундарды алып келгендер болду. Бул тууралуу Алмаз Бекбоев Sputnik Кыргызстан радиосунун эфиринде маек куруп жатып билдирди.
Анын айтымында, кыргызстандык балбандар дүйнөдө ири атаандаштык көрсөтүп, күчтүү курама командага айланды.
"Күрөш биздин каныбызда бар эмеспи. Өлкөдөгү спорттун түрлөрүнөн күрөш боюнча ири мелдештердеги жогорку жетишкендиктер көп. Эркин күрөштү ала турган болсок, акыркы үч жылда жакшы көрсөткүчтөргө жете алдык. Алсак, 23 жашка чейинкилер арасында дүйнөнүн эки чемпиону чыкты, чоңдор арасында континенталдык биринчиликтерде, дүйнө кубокторунан байгелүү орундарды алып келгендер болду. Балбандардын ийгилиги тажрыйбалуу машыктыруучулардын келиши менен башталды. Тактап айтканда, учурдагы башкы машыктыруучу Руслан Маджиновду, улук машыктыруучу Сүймөнкул Таабалды уулун чет өлкөдө иштеп жүргөндө чакырып, алардын тажрыйбасын, ыкмаларын колдондук. Агайлардын мээнети, спортчулардын каалоосу менен жакшы ийгиликтер болууда", — деди Бекбоев.
Ошондой эле адис Олимпиада-2024 алдында күрөш боюнча лицензиялык турнирлердин бири Бишкекте өтүшү чоң жеңиш экендигин кошумчалады.