БИШКЕК, 27-июл. — Sputnik. Казакстандын борбору Астанада Манастын айкелин орнотуу үчүн конкурс жарыяланды. Бул тууралуу Мамлекеттик сатып алуулар порталынан көрүүгө болот.
© Фото / Портал государственных закупок
Айкелдин тендердик баасы 25 миллион сом деп, 30-августка чейин ишти толук бүткөрүү талабы коюлган. Орнотууга кызыкдар тараптар 31-июлга чейин Маданият, маалымат, спорт жана жаштар саясаты министрлигине табыштама бериши шарт.
Долбоордо айкөл Манастын ат минип турган образы чагылдырылып, артына эки кабылан коюлары жазылган. Айкелдин бийиктиги 5,5 метр, туурасы 1,5 метрди түзөт. Ал эми кабыландын бийиктиги 170 сантиметр, туурасы 70 сантиметр деп көрсөтүлгөн.
Белгилей кетсек, Маданият министрлиги мындан эки жыл мурда аталган эстеликти жасоого сынак жарыялаган болчу. Анда Манастын айкели Астана шаарынын Жубанов менен Пушкин көчөлөрүнүн кесилишине орнотулары айтылган.