БИШКЕК, 24-июл. — Sputnik. Прокуратура кызматкерлери жумуш учурунда каза таап жана майып болуп калса төлөнүүчү компенсациянын суммасы 12 эсеге азайтылды. Тиешелүү мыйзамга президент Садыр Жапаров кол койгонун маалымат кызматынан билдиришти.
Аталган конституциялык мыйзам 29-июнда Жогорку Кеңеш тарабынан кабыл алынган.
Кызмат учурунда жабыркаган прокурорго бир жолу берилүүчү компенсациянын суммасы:
прокурор кызматтык милдетин аткарып жатып курман болсо, үй-бүлөсүнө анын акыркы кызмат орду боюнча 20 орточо айлык эмгек акысынын өлчөмүндө бир жолку жөлөк пул төлөнөт (учурда 20 жылдык маянасы берилет);
I топтогу майып болуп калса — 10 орточо айлык эмгек акы (учурда 10 жылдык маяна);
II топтогу майыптыкка — 8 орточо айлык эмгек акы (учурда 8 жылдык маяна);
III топтогу майыптыкка — 5 орточо айлык эмгек акы (учурда 5 жылдык).
Долбоор сунушталып жатканда финансы министри Алмаз Бакетаев мыйзам күчүнө кирсе орто эсеп менен 1,5 миллион сом төлөнүп каларын айткан.
Белгилей кетсек, былтыр июль айында Чаткал районунун прокурору Бакирдин Жанузаков Бишкектен баратканда автоунаасы аласалып каза болгон. Мындан улам анын үй-бүлөсүнө 21,7 миллион сом компенсация берүү маселеси Жогорку Кеңешке киргизилген. Аталган норма коомчулукта түрдүү сын-пикирлерди жараткан.