БИШКЕК, 24-июл. — Sputnik. Украина учкучсуз башкарылган эки аппарат менен Москвада эки объектиге чабуул жасоого аракет кылып, бирок РЭК алардын мизин кайтарды. Бул туурасында РИА Новости билдирди.
"24-июль күнү эртең менен Киев режими учкучсуз башкарылган эки аппарат менен Москва шаарынын аймагындагы эки объектиге чабуул жасоого аракет кылды. Радиоэлектрондук каражаттар менен алардын мизи кайтарылып, талкаланды", — деп айтылган маалыматта.
Чабуулдан жабыркагандар болгон жок.
Буга чейин Москванын мэри Сергей Собянин таңкы саат төрттөр чамасында учкучсуз башкарылган аппараттар эл жашабаган эки имаратка чабуул жасаганын, андан олуттуу деле зыян келбегенин, жабыркагандар жоктугун маалымдаган.
Борбордук транспорт департаменти Комсомольск жана Лихачев проспектилеринде кыймылдын жабылгандыгын айтты.
РИА Новостинин кабарчысы Лихачев проспектиндеги "Леруа Мерлен" имаратына жакын жерде 15ке чукул тез жардамдын, полициянын жана Өрт өчүрүү кызматынын автоунаалары турганын билдирди. ФСБчылардын машинасы да келген.
Бул Киев режиминин Москвага чабуул жасоого кылган биринчи аракети эмес. 4-июлда РФтин борборунда беш дронду атып түшүрүшкөн. Экөө Валуев поселогунда жок кылынып, сыныктары талаага түшкөн. Дагы бири Кубинкада талкаланса, эки дронду Новая Москва районунда жок кылышкан.