Алдыдагы 5-6 жылда локалдык чыр-чатактар көбөйөт, анткени глобалдык саясий система өзгөрүүдө. Мындай пикирин Чынара Эсенгул Sputnik Кыргызстан радиосуна маек куруп жатып билдирди.
Эксперттин айтымында, ал кагылыштар чыгышы ыктымал деген аймактардын катарында Борбор Азия дагы бар.
"Дүйнөлүк саясий система өзгөрүүгө душар болууда. Тилекке каршы, ал жеңил-желпи ишке аша турган нерсе эмес. Дүйнөлүк масштабдан алганда чакан деп эсептелген Кыргызстанда системаларды реформалоодо кандай оорчулуктарга туш болуудабыз. Андыктан глобалдык алкакта 5-6 жылда, балким андан дагы узак убакытта көптөгөн локалдуу чатактар чыгышы ыктымал. Анын ичинде дал ушул Борбор Азия дагы чыр-чатак чыгып кетүү коркунучу бар аймактарга кирет. Дүйнө эки блокко бөлүнүп калганын белгилеп келебиз. Мурда бул Советтер Союзу менен АКШ болсо, учурда Кытай, Россия баштаган өнөктөштөрү, ошол эле БРИКС, ШКУ. Ал эми экинчи тарабында жамаатык же болбосо саясий Батыш. Мына ошол эки тарап чакан чатактарынын натыйжасында өздөрүнүн саясий чек арасын жана тараптарын аныктайт", — деди Чынара Эсенгул.
Ошондой эле ал дүйнөлүк державалардын террорчулук, экстремизмди өз пайдасына колдонуу кооптуулугу бар экенин кошумчалады.