Октябрь районунда 22 мектеп, 39 бала бакча бар. Алардын бардыгы борбордук жылытуу системасына туташкан. Жаӊы салынган №100 мектеп көмүр жана электр энергиясы менен жылытылчу. Бул объектинин от казаны газга өткөрүлүп жатат. Бул тууралуу Жаныбек Орозалиев Sputnik Кыргызстан радиосунун эфиринде маек куруп жатып билдирди.
Анын айтымында, аталган райондогу газдаштырылган конуштарда жашагандардын 56 пайызы үйлөрүнө газ киргизген.
"Октябрь районунда 326 миӊ калк жашайт. Жалпы алты конуш бар болсо, анын бешөө газдаштырылган. Конуштардагы 72 миӊ түтүн үйлөрүнө газ киргизип, колдонуп жатат. Учурда "Газпром Кыргызстан" ишканасы менен келишим түзүлүп, долбоордун сметасы бекитилип, жогорку Көк-Жар аймагындагы 224 түтүнгө газ киргизип берүү пландалууда. Бүгүнкү күндө Октябрь районунда 115 чакырым газ түтүктөрү тартылган. Кандайдыр бир себептер менен газ түтүктөрү барбай калган көчөлөргө да куурларды тартуу аракеттери көрүлүүдө. Эми "Газдаштыруу" деп аталган программанын алкагында элге насыя берүү жолу менен кышка чейин үйлөрүнө газ киргиздирүү маселеси турат. Калк арасында түшүндүрүү иштери активдүү жүрүүдө. Мунун баары борбор калаанын экологиясынын бузулуусун, ыш маселесин алдын алуу иретинде жасалууда. Былтыр үйдү газ менен жылыткан жарандар көгүлтүр отко көмүр жаккандай эле каражат сарпталарын айтып жатышат. Мындайча айтканда, анча деле чоӊ айырмачылык жок экенин белгилешти. Биринчиден, газ анча кымбат эмес, экинчиден, түйшүгү жок, таза болот. Андыктан шаар тургундарын абанын булганышын кыйла азайтуу максатында, жылуулуктун альтернативдик түрүнө өтүүгө чакырам. Көгүлтүр отту киргизүүдө каражаттын 70 пайызы газ от казанына кетет", — деди Орозалиев.
Ал түтүктөрдүн үйгө алыс же жакын жайгашкан аралыгына жараша газ киргизүүгө болжол менен 80-100 миӊ сом акча керектелерин кошумчалады.