БИШКЕК, 16-июл. — Sputnik. Сокулук районунда жол тоскон окуядан кийин кылмыш иши козголуп, блогер Эртай Искаков менен эки жергиликтүү тургун кармалды. Бул тууралуу Чүй облустук милициясы кабарлады.
© Фото / мвд
Эскерте кетсек, 14-июль күнү Селекция айылында адамдардын тобу Түштүк магистралды тосуп, автоунаалар жүрө албай калган. Бул тууралуу милициянын нөөмөт бөлүмүнө кабарланган. Жерине келген ыкчам тергөө тобу жолду 100дөй киши тосуп алганын, алардын баары жергиликтүү тургундар экенин аныктаган. Мындай кадамга суунун тартыштыгы себеп болгон. Нааразы болгондорго тиешелүү жетекчилер келип, түшүндүрүү иштерин жүргүзүшкөн.
“Бирок тургундар жол тосууну улантып, милиция кызматкерлерин көздөй таш ыргыта башташкан. Сүйлөшүүлөрдөн кийин түнкү экиде гана жол ачылып, чогулгандар тарап кеткен”, — деп айтылат маалыматта.
Текшерүү иштери башталып, анын жүрүшүндө айылдагы Сары-Өзөн жаңы конушунун тургундары мессенжерде суу көйгөйүн талкуулаганы аныкталды. Жашоочуларга Э.И. аттуу блогер кошулган (инициалдарга Эртай Искаковдун аты-жөнү туура келүүдө, соцтармакта аны милицияга алып кетип бара жаткан видео тараган).
“Ал кескин чаралар көрүлмөйүнчө суу маселеси чечилбей турганын айтып, жашоочуларды жол тосууга үндөгөн. Өзү соцтармактагы баракчалары аркылуу жардам берерин айткан. Текшерүүнүн жүрүшүндө Селекция айылындагы жолду бир эле адам уюштуруп, ишке ашырганы аныкталды”, — деп айтылат маалыматта.
Натыйжада Кылмыш-жаза кодексинин 279 ("Жолду мыйзамсыз тосуу") жана 280 ("Бейбаштык") беренелери боюнча иш козголду.
Биринчи берененин негизинде шектүү катары Э.И. кармалып, убактылуу кармоочу жайга киргизилди. Экинчи айып менен эки жергиликтүү тургун камакка алынды.
Тергөө уланууда.