БИШКЕК, 13-июл. — Sputnik. Президент Садыр Жапаров айрым мыйзам актыларына (Кыргыз Республикасынын Кылмыш-жаза кодексине, Кыргыз Республикасынын Укук бузуулар жөнүндө кодексине) өзгөртүү киргизүү жөнүндө мыйзамга кол койду. Ага ылайык, жерлерди өзүм билемдик менен басып алгандар үчүн жоопкерчилик күчөтүлгөнүн өлкө башчынын маалымат кызматы кабарлады.
Жерлерди мыйзамсыз басып алууга жана аларга курулуш курууга жол бербөө максатында кабыл алынган мыйзамды Жогорку Кеңеш 25-майда колдоп берген.
Жаңы мыйзамга ылайык, эми айыл чарба жерлерин басып алып, аларга имарат куруп алгандар 5-7 жылга (мурда 5 жылга чейин эле) эркинен ажыратылат, айып пул 100дөн 200 миң сомго чейин көтөрүлдү (мурда 20дан 50 миңге чейин болчу). Ошол эле учурда басып алуунун уюштуруучулары 10-12 жылга камалат (7-10 жыл болчу).
Мындан сырткары, Кылмыш-жаза кодексине жерди басып алууга жол берген кызмат адамдарынын жоопкерчилиги жөнүндө жаңы норма киргизилди. Мындай ишке барган жооптуу кызматкерлер 30-70 миң сом айып пул же үч жылга чейин эркинен ажыратуу менен жазаланат. Ошол эле мөөнөткө мамлекеттик кызматта иштешине тыюу салынат.
Жерлерди мыйзамсыз ээлеп алуу, кеңейтүү фактыларын алдын алуу, тыюу салуу, ошондой эле жерлерди максаттуу багыты боюнча пайдаланууну контролдоо министрлер кабинетине жүктөлдү. Мындан тышкары, өкмөткө азык-түлүк коопсуздугун камсыздоо максатында айыл чарба багытындагы жерлерди жакшыртуу жана сарамжалдуу пайдалануу боюнча чаралар комплексин иштеп чыгуу тапшырылган.