БИШКЕК, 12-июл. — Sputnik. Бишкектеги “Российская газетанын” редакциясында тегерек стол өтүп, анда эксперттер Кыргызстандын маалымат коопсуздугун камсыздоодо медиа мейкиндигинин ролун талкуулашты.
“Мир” телерадиоберүү компаниясынын Кыргызстандагы филиалынын директору Нурдин Урмамбетов Батыштын таасирине каршы туруу үчүн конструктивдүү күчтөр кыргыз тилинде иш алып баруусу керектигин белгиледи.
"Бүгүнкү күндө Кыргызстанда Евразия мейкиндигинде интеграция жана консолидация идеялары калктын эне тилинде, башкача айтканда, кыргыз тилинде берилиши керек. Тилекке каршы, бул маалымат чөйрөсүндө жергиликтүү ММКлардан тышкары көпчүлүк учурда батышчыл басылмалар гана иштейт", — деди Урмамбетов.
Анын пикирине саясат таануучу Марс Сариев кошулуп, республикада, өзгөчө аймактарда коом абдан саясатташып, активдүү болуп жатканын эске салды.
"Бул потенциалды креативдүү долбоорлорго, анын ичинде евразиялык интеграция форматына да колдонуу зарыл. Калк менен өз эне тилиңизде сүйлөшкөндө гана аларга жете аласыз. Мисалы, инновациялык Асман шаары жакшы мега-долбоор иштелип чыкты. Бул нерсе улуттук идеяга айланып кетиши мүмкүн. Бирок бийлик бул долбоорду ЖМКда көрсөтүү маселесин начар иштеп чыгып, толук маалымат берген жок. Демек, ага карата кандайдыр бир терс мамиле бар, массалык маалымат каражаттары менен туура иш алып баруу жана маалымат талаасын калыптандыруу абдан маанилүү", — деп баса белгиледи Сариев.
Sputnik Кыргызстан агенттигинин серепчиси Таалайбек Ороскулов белгилегендей, бүгүнкү күндө жалпыга маалымдоо каражаттары көп учурда бытыранды болуп, жалгыз жашап келет.
"Медиаконтент ар дайым кымбат, ресурстарды издеп журналисттер тигил же бул багытта "миграцияга" аттанышат. Батыш жигердүү иштеп, ар кандай долбоорлорду, анын ичинде медианы да каржылап жатат. Тышкы оюнчулардын таасирине туруштук берүүгө Кыргызстан жана башка мамлекеттердин жалгыздап күчү жетпейт. Ошондуктан маалымат күн тартибинин актуалдуу көйгөйлөрү талкууланып, чечиле турган медиа интеграция платформасын түзүү зарыл", — деди Ороскулов.
"Ысык-Көл – ири Евразия" (КРСУ) Эл аралык аналитикалык клубунун директору Айнура Көчөрбаева интеграциялык процесстер чечимдерди иштеп чыгуу үчүн терең аналитикалык мамилени талап кыларын белгиледи.
"Бизде көптөгөн пайдалуу долбоорлор бар, анын ичинде өсүп келе жаткан талдоочу муунду тарбиялоого багытталган долбоорлор бар. Бирок, тилекке каршы, азырынча бул идеялар массалык маалымат каражаттарында жетишсиз чагылдырылгандыктан кеңири катмарга жетпей келет. Ошондуктан мен дагы бул багыттагы иштерди, анын ичинде кыргыз тили боюнча аракеттерди күчөтүүнү колдойм", — деп баса белгиледи Көчөрбаева.