Коммерциялык купуя сыр жөнүндө мыйзам ишкерлерди колдоо багытында кабыл алынган. Бул тууралуу Калыгул Салиев Sputnik Кыргызстан радиосуна маек куруп жатып билдирди.
Анын айтымында, ошол эле учурда бул мыйзам боюнча айрым талаштуу маселелер кездешет.
"Коммерциялык купуя сыр боюнча мыйзам 1998-жылы кабыл алынып, бир нече жолу өзгөртүлгөн. 2021-жылы мыйзамдарды иретке келтирүү максатында уюштурулган инвентаризациялоонун алкагында Юстиция министрлиги бул мыйзамга тийиштүү өзгөртүүлөрдү сунуштоодо. Мындан тышкары, маалымат алуу укугу жөнүндө мыйзам менен коммерциялык сыр жөнүндө мыйзамдын ортосундагы карама-каршылыкты жоюу дагы максатталган. Анткени маалымат алуу укугу жөнүндө мыйзамда маалыматтын жеткиликтүүлүгү тууралуу сөз болууда. Конституциянын 33-беренесинде жарандардын маалымат алуу укугу белгиленген. Ошол эле учурда ишкердин укугун камсыздоо үчүн коммерциялык сыр жөнүндөгү мыйзамда айрым чектөөлөр каралган. Натыйжада маалымат алуу укугу жогорубу же коммерциялык сырга артыкчылык берилеби деген талаш жаралууда. Мына ошону жөнгө келтирүү үчүн өзгөртүүлөр сунушталып жатат. Мыйзам боюнча мамлекеттик, аскердик, кызматтык, банктык жана коммерциялык болуп купуя сырдын бир нече түрү бар. Коммерциялык купуя сыр боюнча өзүнчө мыйзам кабыл алынган. Ал ишкананын ичиндеги өндүрүш, кызмат, технология жана башка купуя сырлары болсо, сыртка чыгарбай, жайылтпай сактоого укуктуу. Ал купуя сыр мамлекеттик кызматкерлер, ишкананын жумушчулары жайылтканы үчүн тийиштүү чаралар дагы көрсөтүлгөн. Бул ишкердикти колдоого багытталган укуктук нормативдик акт", — деди Салиев.
Ошондой эле ал маалыматты ачыктоодо кайсы бир чектөөлөрдүн болушу мыйзам ченемдүү көрүнүш экенин кошумчалады.