БИШКЕК, 11-июл. — Sputnik. Учурда турак үйлөрдөгү өрт кырсыгынын бирден-бир себеби кондиционер болууда. Бул туурасында Өзгөчө кырдаалдар министрлиги билдирди.
Статистика боюнча, 10го жакын өрт кырсыгы кондиционерди туура эмес колдонуудан улам келип чыкканы белгиленди. Мындан улам ӨКМ кондиционерди колдонууда бир нече эрежелерди сактоо абдан маанилүү экенин эскертет:
Механизмдин ичинде өрт чыгышына жол бербөө үчүн абанын жакшы айлануусу маанилүү. Желдетүүчү түтүктөрдү тосууга болбойт. Кондиционер эч качан чүпүрөк же башка күйүүчү материалдар менен жабылбашы керек. Суу жана чаң агрегаттын ичине кирбеши үчүн эрежелерди так сактоого чакырабыз.
Тышкы блок ысык абаны бөлүп чыгарат, ошондуктан анын жанына күйүүчү материалдарды коюуга жана үстүнө ар кандай нерселерди жаап кургатууга тыюу салынат.
Кондиционерди орнотууда бөлмөдөгү зымдар аппараттын кубаттуулугуна дал келиши абдан маанилүү. Аппараттын зымы буралып, кысып же өтө катуу болбошу керек. Ал түздөн-түз розеткага туташтырылышы зарыл. Зымдын кубаттуулугун көзөмөлдөө абдан маанилүү, болбосо өрт чыгышын шарттайт. Кондиционердеги атайын фильтрди жок дегенде бир айда бир жолу тазалап туруу зарыл.
Шайманды розеткадан сууруп алуудан мурун башкаруу пультун колдонуу менен анын иштешин токтотуу керек.
Кондиционерлерди узак убакытка толук кубаттуулукта калтырууга болбойт. Ар бир 1,5-2 саат сайын өчүрүп туруу талапка ылайык. Ошондой эле түнү бою күйгүзүү сунушталбайт жана аны эч качан иштетилген абалда калтырбаңыз!