БИШКЕК, 10-июл. — Sputnik. Россиянын президенти Владимир Путин аскердик козголоң аракетинен беш күн өткөндөн кийин "Вагнердин" жетекчилиги менен Кремлден жолуккан. Бул тууралуу мамлекет башчысынын маалымат катчысы Дмитрий Песков билдиргенин РИА Новости жазды.
"Чындап эле президенттин ушундай жолугушуусу болгон. Ал ага отряддардын командирлерин жана компаниянын жетекчилигин, жалпы 35 кишини чакырган. Пригожин өзү дагы болду. Жолугушуу 29-июнь күнү Кремлде өтүп, үч саатка созулду", — деди ал журналисттерге.
Песковдун айтымында, Путин жолугушууда компаниянын фронттогу аракеттерине, ошондой эле 24-июндагы окуяларга өзүнүн баасын берген. Мындан тышкары, командирлердин түшүндүрмөсү менен сунуштарын уккан.
"Алар мамлекет башчысынын жана башкы командачынын ишенимдүү тарапташтары жана жоокерлери экенин баса белгилешти", — деди Кремлдин өкүлү.
Эскерте кетсек, 2023-жылы 24-июнга караган күнү "Вагнер" тобу Ростов-на-Дону шаарындагы Түштүк аскер округунун штабын басып алган. Мындай аракет Евгений Пригожиндин аталган топко Куралдуу күчтөрдүн соккусу тууралуу сөзүнөн кийин жасалган. Бирок Коргоо министрлиги да, ФСБ да муну дароо четке каккан.
РФ президенти Владимир Путин "вагнерчилердин" кылыгын кылмыш деп атаган. Кийинчерээк Беларусь президентинин маалымат кызматы Александр Лукашенко Пригожин менен сүйлөшүп, "Вагнер" тобунун Россия аймагында ишмердүүлүгүн токтотуу боюнча макулдашканын кабарлаган. Ошол эле күнү кечинде РФ лидеринин маалымат катчысы Дмитрий Песков Пригожин Беларуска кетерин, кылмыш иши токтотуларын билдирип, буга Россия президентинин сөзү кепил экенин айткан. 27-июнда иш токтотулганы белгилүү болду.