Адамдардын колуна балапан кезинде түшкөн жырткыч канаттуулар кийин көбүнчө сүрөткө түшүү үчүн гана колдонулат. Бул тууралуу Адис Мадиев Sputnik Кыргызстан радиосунун эфиринде маек куруп жатып билдирди.
Анын айтымында, бизнестин бул түрү менен алектенгендер жырткыч канаттуулардын популяциясына чоң зыян келтирүүдө.
"Июндун аягы Ысык-Көлдө жырткыч канаттууларды күтүү жана кармоонун мыйзамдуулугу текшерилери айтылган. Себеби Ысык-Көлдө туристтик сезондо жырткыч канаттуулар (шумкар, бүркүт, кыргый) акча табуу үчүн колдонулат. Ысык-Көл — Нарын облустук башкармалыгына жырткыч канаттууларды багуу жана кармоонун мыйзамдуулугу боюнча рейд жүргүзүү тапшырылган. Жыйынтыгында мыйзамсыз кармалган 10 канаттуу аныкталып, жаратылышка коё берилди. Мындан тышкары, жырткыч куштарды кармоого тартылган жашы жете элек балдарга жана алардын ата-энелерине мыйзам бузуулар катталган учурда мыйзам чегинде көрүлүп жаткан чаралар тууралуу маалымат берилди. Негизи мыйзам боюнча кызыл китепке кирген жырткыч канаттууларды кармоо талаптары бар. Аларга идентификациялык карта, мындайча айтканда, паспорт берилип, чип тагылышы керек. 2018-жылы "КРдин аймагында алгыр жырткыч куштарды күтүү жана пайдалануу эрежесин бекитүү жөнүндө" токтом кабыл алынган. Бул токтомго ылайык, көлдүн жээгинде пайдаланылган куштар мыйзамсыз колдонулуп жатат. Министрлик, Илимдер академиясы тарабынан жырткыч куштарга атайын байкоо жүргүзүү методикасы иштелип чыгышы керек болчу. Бирок азыркыга чейин аягына чыкпай жатат. Себеби булар миграциялык куштар болгондуктан аларга байкоо жүргүзүү өтө татаал. Бул ыкма менен өлкө аймагындагы жырткыч куштардын саны аныкталган соӊ Илимдер академиясы тарабынан кимдер, канча убакыт, канча кушту колго кармаса болору тууралуу так айтат эле. Азыр методика иштелип бүтө электигине байланыштуу ушундай чар-жайыт көрүнүштөр болуп жатат", — деди Мадиев.
Ал жырткыч канаттууларды мыйзамсыз сатып алуу жана кармоо фактылары аныкталса, мыйзам чегинде тез арада чара көрүлөрүн кошумчалады.