БИШКЕК, 6-июл. — Sputnik. Рублдин курсу тышкы соода динамикасынын таасири астында төмөндөп жатат. Бул тууралуу Россиянын Борбордук банкынын төрайымы Эльвира Набиуллина билдиргенин РИА Новости жазды.
"Бизде алгач эле тышкы сооданын динамикасын караш керек. Себеби бул курстун кыймылын аныктайт", — деди ал.
Төрайымдын айтымында, учурдагы операциялардын оң эсептери 2023-жылдын биринчи кварталында былтыркыга салыштырмалуу беш эсе аз болду.
"Учурда курстун динамикасы проинфляциялык коркунучтар менен коштолууда. Биз муну негизги ставка боюнча чечим кабыл алууда эске алабыз", — деди Набиуллина.
Ал белгилегендей, Россияда инфляциялык олку-солкулук башка мамлекеттерге караганда арбын болот. Бирок ага карабастан Борбордук банкка болгон ишеним жогорулоодо. Муну насыялоонун динамикасынан көрүүгө болот.
"Биз каражат-кредиттик саясат, инфляция таргети жана калкыма курс режими тынч заманда дагы, курч мезгилдерде дагы, азыр баштан кечирип жаткан структуралык трансформация учурунда дагы өзүнүн эффективдүүлүгүн көрсөттү деген тыянакка келип жатабыз", — деди ал.
Бейшемби күнү Москва биржасында евронун курсу 101 рублге, доллар 93 рублге жеткен. Эки валюта тең 2022-жылдын март айынан бери алгачкы ирет ушул деңгээлге чыгып жатат.