БИШКЕК, 4-июл. — Sputnik. Шанхай кызматташтык уюмунун эл аралык иштердеги ролу улам бараандуу болуп, тынчтыкты, туруктуулукту сактоого, катышуучу мамлекеттердин экономикалык туруктуу өсүшүн камсыз кылууга, элдердин ортосундагы байланышты чыңдоого чыныгы салымын кошууда. Мындай пикирин Россия лидери Владимир Путин ШКУга мүчө мамлекеттердин президенттеринин 23-саммитинде сүйлөп жатканда билдирди.
Ал Россия эл аралык маселелерге консолидацияланган мамилени чагылдырган биргелешкен декларациянын долбоорун колдой турганын да айтты.
"Россия Нью-Дели декларациясынын долбоорун колдойт. Анда биздин өз ара кызматташууну мындан ары карай ар тараптуу өнүктүрүүнүн максаттары жана милдеттери аныкталып, эл аралык актуалдуу маселелерге карата консолидацияланган мамилелерди жасоо ыкмалары, жолдору чагылдырылган", — деди РФ башчысы видео-саммитте сүйлөп жатып.
ШКУ 2001-жылы негизделген. Ага Кытай, Кыргызстан, Россия, Казакстан, Тажикстан, Өзбекстан, Пакистан жана Индия мүчө. Байкоочу мамлекеттер — Афганстан, Беларусь, Иран менен Монголия. Өнөктөш мамлекеттер — Азербайжан, Армения, Камбоджа, Непал, Түркия, Шри-Ланка, Египет, Сауд Арабиясы, Катар.
2022-жылы сентябрда ШКУнун Самарканд шаарындагы саммитинде Бахрейн, Мальдив, Бириккен Араб Эмирлиги, Кувейт, Мьянмага өнөктөш макамын берүү кадамы башталган.
Бүгүнкү саммитте Иранды толук кандуу мүчө катары кабыл алуу каралган.