БИШКЕК, 4-июл. — Sputnik. Mega соода маркасындагы (мурдагы MegaCom) "Альфа Телеком" жабык акционердик коому аукционго коюлду. Бул туурасында Мамлекеттик мүлктү башкаруу агенттиги билдирди.
Компаниянын баштапкы баасы 14,6 миллиард сомго (166 миллион доллар) бааланган. Аукцион электрондук түрдө өтүп, ар бир баскычта 200 миллион сомдон көтөрүлүп турат.
Сатып алууну каалаган тараптар табыштамаларын 4-июль саат 10:00дөн 2-октябрь саат 10:00гө чейин жөнөтсө болот. Ошол эле күнү саат 16:00дө электрондук соода аянтчасы порталында аукцион өтөт.
Мамлекет ээлик кылып келген "Альфа Телекомдун" 8 миллион 700 миң 100 даана акциясы болсо, ошонун баары толугу менен сатылат. Аталган компаниянын 2,5 миллион сомдон ашык абоненти, 5 503 базалык станциясы бар экени жана 1 292 адам эмгектенери жазылган.
Белгилей кетсек, буга чейин президенттин маалымат кызматы Эрбол Султанбаев Mega жеке колго же чет өлкөлүк компанияларга сатылбай тургандыгын билдирген.
"Менчиктештириле турган объектилердин тизмесине киргизилгенден кийин башкаруучу өзгөрүп, же Улуттук банк, же Мамлекеттик өнүктүрүү банкы кожоюн болуп калат деп болжолдонууда. Башкача айтканда, компания өлкөнүн бюджетин толтурууга салым кошууну улантуу менен мамлекеттин карамагында калат", — деп айткан маалымат катчы.
Ал эми бүгүн Мамлекеттик мүлктү башкаруу агенттиги тараткан билдирүүдө аукционго жеке жактар да, юридикалык тараптар да катыша алары жазылган.
Эске салсак, "Альфа Телеком" ишканасынын акциясынын 100 пайызы мамлекетке тиешелүү. Бийликтин көп жылдар бою компанияны сатуу аракетинен майнап чыкпай, анын баштапкы баасы бир нече жолу (19 миллиард сом жана 13,5 миллиард сом) өзгөргөн.
Өткөн жылдын аягында Кыргызстанда "Альфа Телеком" ишканасын сатуу маселеси кайрадан көтөрүлгөн.