8-июлда Бишкекте "Ак илбирс" улуттук киносыйлыгы тапшырылат. Бул тууралуу Таалайбек Кулмендеев Sputnik Кыргызстан радиосунун эфиринде маек куруп жатып билдирди.
Анын айтымында, аталган киносыйлыктын максаты — кино ааламындагы жылдын мыктыларын аныктоо.
"Быйыл буга чейинки иш-чаралардан айырмаланып 8-июлда 2021-2022-жылы тартылган кинолор ат салышат. Пандемия бул киносыйлыкка да таасирин тийгизип, соңку жылдары өз учурунда өткөрө албай калдык. Быйыл кино жаратмандардын алдыңкылары 18 номинация боюнча аныкталат. Иш-чарага катышууну каалагандар 8-июль күнү Бишкектеги "Манас" кинотеатрына саат 17:00гө келсе болот. Кирүү акысыз. Мыктыларды буга чейин "Ак илбирс" сыйлыгын алгандар тандайт. Уюштуруучулар барган сайын номинациялардын санын көбөйтүүгө аракет кылып жатабыз. Тасмада иштеген ар бир кесип бааланса деген ниетибиз бар", — деди Кулмендеев.
Ал ошондой эле аталган иш-чарага чет элдик коноктор да келерин кошумчалады.