Дене тарбия жана спорт академиясы 1955-жылы түптөлүп, 68 жыл ичинде 20 миңден ашык адисти даярдады. Бул тууралуу Саитдин Азизбаев Sputnik Кыргызстан радиосунун эфиринде маек куруп жатып билдирди.
Анын айтымында, кыргыз спортунда эл аралык ири жетишкендиктерге жеткен спортчу, машыктыруучу, педагогдор Дене тарбия жана спорт академиясынын бүтүрүүчүлөрү болуп саналат.
"Дене тарбия жана спорт академиясы 1955-жылы түптөлүп, 68 жылдык тарыхында жалпысынан 20 миңден ашык адисти даярдады. Бул багытта дене тарбия жана аскерге чейинки даярдоо предметтери боюнча мектеп мугалимдерин, спорттун олимпиадалык, олимпиадалык эмес, улуттук түрлөрү боюнча машыктыруучуларды, педагогдорду даярдап, өлкөдөгү спорттун өнүгүшүнө чоң салым кошту. Бул окуу жайда Олимпиаданын, дүйнөнүн чемпиондору билим алышкан. Туура коюлган окутуу методикаларынын натыйжасында машыктыруучулар жакшы көрсөткүчтөргө жете баштады. Акыркы учурдагы ийгиликтерди эске алып, Дене тарбия академиясына тапшырууну каалаган абитуриенттер көбөйүүдө", — деди Азизбаев.
Ошондой эле адис Дене тарбия жана спорт академиясына тапшыруу үчүн жалпы республикалык тестирлөө талап кылынбай тургандыгын кошумчалады.