БИШКЕК, 28-июн. — Sputnik. Кыргыз-Россия славян университети мындан ары студенттер үчүн жатакана бере турганын окуу жайдын маалымат кызматы билдирди.
"Быйыл мурунку жылдардан айырмаланып башка аймактардан келген студенттерге жатакана беребиз. Университетибизде дайыма болуп келген кемчиликти жоюп жатабыз. Быйылкы жылдан баштап Россиянын өнүктүрүү программасынын алкагында бизге каражат бөлүнүүдө", — деди окуу жайдын ректору Герман Лоцев.
Жатакана социалдык жана материалдык абалы оор студенттерге, ошондой эле аймактардан келгендерге берилет. Алардын арасында кыргызстандыктар гана эмес, чет өлкөлүк жарандар да болушу мүмкүн.
Бул максатта Россия КРСУга 35 миллион рубль бөлүүдө.