БИШКЕК, 27-июн. — Sputnik. Россиянын Самара облусундагы федералдык трассада кагылышкан эки автоунаанын тең айдоочулары Кыргызстандын жарандары болгон. Бул тууралуу ТИМден билдирди.
"Автокырсыктан жабыркап, ооруканага түшкөндөрдүн арасында Кыргызстандын жарандары жок", — деп айтылат маалыматта.
Эске салсак, түндө болжол менен саат 1:30дарда Россиянын Самара облусундагы федералдык трассада Honda Stepwgn менен Hyundai Elantra кагышып, алты адам көз жумган. Алардын ичинен экөө кыргызстандыктар болгон.
Көз жумгандар 31 жаштагы эркек жана 44 жаштагы аял киши экени айтылды. Калган төртөө өзбекстандыктар. Булардын сырткары, 20-35 жаштын ортосундагы жети киши жаракат алган. Кыргызстандын Россиядагы элчилиги кырсыктагандарга укуктук жактан жардам көрсөтүп, көз жумгандардын сөөгүн мекенине жеткирүү боюнча иштеп жатканы белгиленди.