БИШКЕК, 24-июн. — Sputnik. Кыргызстандык мушкер Немат Абдрашитов BRAVE CF уюмунун чемпиону болду. Бул тууралуу аталган уюм социалдык тармактагы баракчасы аркылуу билдирди.
Беттеш 24-июнга караган түнү Бахрейнде өттү.
Абдрашитов 66 салмактагылар арасында уюмдун учурдагы чемпиону Роман Богатов менен беттешкен. Кармаш беш раундга созулуп, акыры калыстардын чечими менен жеңиш кыргызстандыкка ыйгарылган.
Абдрашитов буга чейин Brave CF уюмунда үч беттеш өткөрүп, бардыгын тең нокаут менен жеңген. Мындан улам уюм аны чемпиондукка талапкер кылган.
Ал эми атаандашы Богатов 2020-жылы UFC уюмунда бир беттеш өткөрүп утулуп калган, бирок башка беделдүү уюмдарда кармашкан.