БИШКЕК, 23-июн. — Sputnik. TikTok аккаунтту популярдуу кылуунун сырын Sputnik Кыргызстан маалымат агенттигинин журналисти Гүлдана Талантбекова айтып берди.
Ал SputnikPro долбоорунун алкагында Sputnik Кыргызстандын маалымат борборунда мастер-класс өткөрдү. Иш-чарага мамлекеттик жана муниципалдык кызматтын маалымат катчылары катышты.
Белгилей кетсек, Sputnik Кыргызстан маалымат агенттиги TikTok аккаунттарын иштетип баштаганына бир жылдан ашты. Учурда орусча баракчабызда 500 миллиондон ашуун, кыргызча баракчабызда 300 миңден ашуун катталуучу бар. Бул Кыргызстандагы Жалпыга маалымдоо каражаттарынын ичинен аталган тармакта эң көп катталуучусу бар аккаунттар болуп эсептелет.
Талантбекованын айтымында, бул тармакта аккантту алдыга жылдыруу үчүн алгач ага жоопкерчиликтүү мамиле кылып, убакытты арноо керек. Мекемелерде атайын TikTok үчүн жооптуу адамдар бөлүнгөнү оң.
"Андан кийин TikTok сервисинин эрежелерин карап, эмнелерди жүктөгөнгө болот же болбойт дегенге көңүл буруу керек. Активдүү эмес же "өлүк" аккаунттарды кайра алдыга жылдырууга көп убакыт кетет, ошондуктан жаңысын ачкан оң. Техникалык жактан вертикалдуу видеолорду салыңыздар. Көптөгөн адамдар туурасынан тартылган видеолорду жүктөшөт. Мындай кылган туура эмес, себеби көргөнгө ылайыксыз, экинчиден, ТикТок аларды көрүүчүлөргө сунуштабайт", — деди журналист.
Дагы бир маанилүү нерсе — видеолор кыска болушу керек. Эң узак деген видеолор 1 мүнөттүк же 50 секундалык, эң кыскалары 10-15 секундалык болгону оң. Эгерде интервью же кайрылуу болсо, бир нече бөлүккө бөлөбүз.
Ошондой эле роликтин темасы кыска жана кызыктуу болгону жакшы, бул көрүүчүнү тартуунун негизги жолу. Видеонун темасын 3-4 секунда гана кармоо зарыл. ТикТокто видео аягына чейин көрүлсө окурмандарга сунуштайт деген эреже бар. Ошон үчүн темасында бардык нерсени дароо айтып салбаш керек.
Мындан сырткары, роликте айтылгандарды титр менен коштоону салтка айлантуу керек, анткени видеону үнү жок көргөндөр көп.
Тренддеги музыкаларды колдонуу, тренд видеолорду тартуу, челлендждерге катышуу, күн сайын баракчага видеолорду жүктөп туруу, хэштег кошуу, түз эфирге чыгып туруу, эффектилерди колдонуу ТикТокто популярдуу болууга жардам берет.