БИШКЕК, 22-июн. — Sputnik. Министрлер кабинетинин төрагасынын орун басары Эдил Байсалов Конституциялык түзүлүштөгү президенттик башкарууну, парламенттик башкарууну жокко чыгарууда. Бул мамлекеттик чыккынчылыкка жатат. Мындай билдирүүнү бүгүн парламенттин жыйынында депутат Шайлообек Атазов жасады.
Эскерте кетсек, буга чейин Байсалов Жогорку Кеңештин социалдык саясат боюнча комитетинин жыйынына катышып, ошол жерден депутаттар менен айтыша кеткен. Өкмөттүн мүчөсү "парламенттин чечимдери кеңеш берүүчү мүнөздө гана экенин" айтып, депутаттарды сындаган.
Атазов Байсалов парламенттин кадырына шек келтирди деп, төрага Нурлан Шакиевден чара көрүүнү талап кылды.
"Эдил Байсалов, биринчиден, мамлекеттик этиканы бузду. Депутаттар менен сүйлөшүүнүн этикасы болот. Экинчиден, Конституциялык түзүлүштөгү президенттик башкарууну, парламенттик башкарууну жокко чыгарууда. Мамлекеттик чыккынчылык жатат бул жакта. Эмне үчүн ал депутатка кайрылып "сиз элдин атынан мага тапшырма бербеңиз" дейт? Биз кимдин атынан беребиз? Үчүнчүдөн, элдин добушун жокко чыгарып жатат. Бизди эл Байсалов келип мазактап кетсин деп шайлады беле? Ал ким өзү? Депутаттар, ушунун сөзүн угуп отура беребизби, парламентке шек келтирип жатат. Байсалов бийликтин эки бутагына ажырым салууда. Эртең бул жарака чоң нерсеге айланат. Ошон үчүн Байсаловдун ишин кароону күн тартибине киргизиш керек деп эсептейм", — деди Атазов.
Кесиптешинин пикирин депутаттар Дастанбек Жумабеков, Талант Мамытов да колдоп чыкты.
Мындан соң ЖК төрагасы Шакиев Эдил Байсалов боюнча "кайсы бир деңгээлде чечим бар" экенин айтты.
"Мен президент жана өкмөт башчы менен сүйлөштүм. Кайсы бир деңгээлде чечим бар. Бүгүн түштөн кийин бул маселе күн тартибине кирет", — деди спикер.