БИШКЕК, 17-июн. — Sputnik. Кыргызстандын футбол боюнча улуттук курама командасынын машыктыруучусу Штефан Таркович менен Иран курамасынын насаатчысы Ардешир Галеной Бишкекте өткөн оюн тууралуу пикирин билдиришти.
Кечээ Бишкекте CAFA Nations Cup-2023 Борбордук Азия турниринин тайпалык баскычынын алкагында Кыргызстан — Иран беттеши өттү. Иран командасы "ак шумкарларды" 5:1 эсебинде жеңип, турнирдин финалына чыкты. Эми Кыргызстандын курама командасы коло үчүн күрөшөт.
Таркович командада өсүү мындай күчтүү атаандаштар менен ойногондо гана болорун белгиледи.
"Биз көп нерсени үйрөнүп, жыйынтык чыгарсак болот. Ирандын футболчулары күчтүү болуп, жеке тирешүүлөрдө жакшы ойношту. Биз турнирде 3-орун үчүн беттеште ойношубуз керек. Биздин оюнчуларда чоң мотивация бар", — деди словакиялык адис.
Галеной "Иран жана Кыргызстандын курама командаларынын күйөрмандары чыныгы жеңүүчү болгонун" айтты.
"Оюнчуларыма тырышчаактыгы жана мыкты оюну үчүн, ошондой эле кабыл алган өлкөгө мыкты уюштуруусу үчүн ыраазычылык билдиргим келет", — деди ал.
Беттештин мыкты оюнчусу, хет-трик жасаган ирандык чабуулчу Мехди Тареми да өз оюн билдирди.
"Кыргызстандын курама командасы алдыга жылды жана күч алды деп ойлойм. Чынын айтсам, мен атаандашымдан мындай оюн күткөн эмесмин, беттеш биз үчүн бир аз оор болду", — деп кошумчалады ал.