БИШКЕК, 16-июн. — Sputnik. Бишкекте "Миссия “Добро" долбоору старт алды. Анын алкагында россиялык адистер ден соолугунан мүмкүнчүлүгү чектелген балдардын ата-энелерине консультация берип жатат.
Россиянын Бишкектеги илим жана маданият борбору (Русский дом) билдиргендей, акция 16-июндан 21-июнга чейин созулат.
Бишкекке Марфо-Мариянын "Милосердие" деп аталган медициналык борборунун өкүлдөрү келди:
Коваленок Оксана Владимировна — башкы дарыгер, педиатр, паллиативдик жардам дарыгери;
Горлов Андрей Александрович — невролог, дарылоочу дене тарбия көнүгүүлөрү жана реабилитация багытынын жетекчиси.
Алар бейтаптарды "Келечек" реабилитациялык (Жибек Жолу, 519) борборунда саат 10:00дөн 17:00гө чейин кабыл алат. Жазылуу үчүн (0508) 30-43-77 номерине чалуу керек.
Россиялык дарыгерлер неврологиялык жана ДЦП оорулары менен жабыркаган 16 жашка чейинки балдарды карайт.
Эске салсак, буга чейин алар Оштогу ден соолугунан мүмкүнчүлүгү чектелген балдардын ата-энелерине жардам беришкен.
"Миссия "Добро" — Россотрудничество, Ыктыярчылар борборунун ассоциациясы жана өнөктөштөр 2021-жылдан бери ишке ашырып келе жаткан чет өлкөдө волонтердук жардам көрсөтүү боюнча кыска мөөнөттүү сапарлар. Бул долбоор Кыргызстанда экинчи ирет ишке ашырылып жатат. Биринчи жолу адистер былтыр күздө келишкен.