Ал эми андан бир нече саат мурун Германиянын коргоо министри Писториус бундесвер Украинанын Россия Куралдуу күчтөрү тарабынан атылган, жок кылынган же олжого алынган танктарынын ордун толуктап бере албастыгын билдирген. Дал ошол билдирүү киевдик режимдин талаптарына жооп болду окшойт. Сөздүн төркүнү "колубуздан келгенин кылдык, эми өзүңөр чечишип алгыла" дегендей. Абалга сереп салган Кирилл Стрельниковдун макаласы РИА Новости агенттигине жарыяланды.
Германия акырына чейин Украинага танктарын бергиси келбей тырышты, бирок америкалыктардын кысымы менен (өздөрү да "Абрамстарды" жөнөтөбүз деп сөз берип отуруп) бергенге аргасыз болгон. Көп өтпөй согуш талаасында өрттөнүп жаткан танктар – германиялыктардын вундервафелине эң начар жарнама.
Бирок баары алар үчүн укмуш башталган эле... Натолук маалымат аянтчалары "Орус жоокерлери Leopard 2 немец танктарынан эмнеликтен чочулайт?" же "Германиянын Украинага танктарын жөнөтүү чечими — согуштагы эң маанилүү учур" деп жайната жазышкан.
Көптөгөн эксперттери да батыш коомчулугуна немец танктарынын агымы "согуштун жүрүшүн өзгөртүү дараметине ээ" экенин түшүндүрүп, "Батыштын заманбап танктары россиялыктардан бир муунга өйдө турат" деген бааны да берүүдөн артка кайтышкан эмес.
"Немец танктары россиялыктардан алда канча мыкты", себеби "немец Leopard 2 мобилдүүлүгү, коргонуусу жана ок күчү боюнча танктардын дүйнөдөгү эң мыктысы" дешкен. Бирок негедир ошондой жогору баага татыган танктардын талкаланганы жыйырмага чукулдап отурат. Демек, Украина Куралдуу күчтөрүнө Германия тарабынан берилген 60 Leopard 2 танкынын үчтөн бирин россиялык аскерлер үч күндө жок кылды. Атайын аскердик операция зонасында өрт чалган "Леопарддар" жөнүндөгү кабарлар батыш медиасы үчүн баштан ылдый куюлган муздак суудай эле болду.
Ар бир Leopard 2 Германиядагы салык төлөөчүлөрдүн кеминде эле 32 миллион долларын жейт. Салыштыруу үчүн "Корнет" танкка каршы ракеталык комплексинин даанасы 80 миң доллардан ашпайт. Баса, Жавелиндин наркы — 600 миң доллар.
Россиялык аскердик күчтөр эки-үч күндө Батыштан келген ар кыл техниканын ондогон бирдигин, анын ичинде Финляндия тарабынан берилген "Леопард" минаны зыянсыздандыруучу машиналары, франциялык AMX-10RC танктары, польшалык Crab өзү жүрүүчү артиллериялык түзүлүшү, америкалык MaxxPro БТРи жана Bradley пехота машинасын жок кылган.
Батыш маалымат булактары Украина Куралдуу күчтөрүнүн "контрчабуулунун" үч күнүндө эле 16 Bradley, Украинага берилген мындай унаалардын он беш пайызы жок кылынганын маалымдашты. Ошондой эле ар кыл маалымат каражаттарында жарыяланган макалаларга таянсак, 2022-жылдын февралынан тарта Украина Куралдуу күчтөрү бардык аскер техникасынын төрт миңге чукул бирдигин жоготкону Батыштагы кураторлорун катуу беймаза кылууда.
Февраль айында эле Германиянын Экономика министрлиги Украинага кошумча 178 Leopard 1A5 танкын экспорттоого макулдук берген. Бирок эми ал бирдиктердин Украинанын согуш талаасындагы азыркы абалынан кийин ал чечим же жылдырылып, же таптакыр жокко чыгарылышы ажеп эмес. Бирок алар менен жабдышса да маңызы жок. Себеби Батыштын укмуш деген куралдары да орус жоокерлерин жеңе албастыгы айдан ачык.