БИШКЕК, 15-июн. — Sputnik. Ичеги-карын инфекциялары – тамак сиңирүү органдарын жабыркатуучу жугуштуу оорулардын тобу. Ооруларды алдын алуу жана мамлекеттик санитардык-эпидемиологиялык көзөмөл департаменти илдеттин белгилерин тизмектеди.
Маалыматта айтылгандай, ичеги-карын инфекциялары топуракта 18 айга чейин, сууда беш айга чейин жашайт. Мындан тышкары, ал инфекциялар түрдүү буюмдарда: кашыкта, идиште, эшиктин кармагычында, эмерек жана оюнчуктарда да болот.
Оору кантип өрчүйт?
Микроб адамдын организмине киргенден кийин 6-48 сааттын ичинде оору башталат. Аталган илдет жайкысын көп болот, себеби ысыкта биз сууну көп ичкендиктен микробдорду өлтүрүүчү ашказан суюктугу мурдагыдан да суюлуп кетет. Ошол эле учурда ушул мезгилде кайнатылбаган суу да көп ичилет, мындан улам адамда ич өтөт, кусат, организмдеги суюктук азаят, суюктук азайган сайын оору күч алат.
Ичеги-карын инфекциясынын белгилери:
алсыздык;
баш оору;
дене табынын көтөрүлүшү;
кусуу;
кийинчерээк ич оору, ичи өтүү менен коштолот.
Ооруну алдын алуу жолдору:
жеке гигиенаны сактоо;
дааратканадан чыккандан кийин, тамактануудан мурун колду самындап жууңуз;
жуулбаган жашылча, мөмө-жемишти жебеңиз, балдарга да бербеңиз. Анда жердеги, адамдардын колундагы инфекциялар өтүшү мүмкүн;
жуулбаган мөмө-жемишке баштыкка оролбогон нанды жана башка азыктарды аралаштырбаңыз;
тамак-ашка чымындын конушунан сактаныңыз;
азыктарды муздаткычка сактаңыз;
тез бузулуучу азыктарды көчөдөн сатып албаңыз.