2023-жылдын аягына чейин Бишкекте 23 социалдык объектинин курулушу, капиталдык оңдоо жана реконструкциялоо иштери аяктайт. Бул тууралуу Мирлан Молдобасаров Sputnik Кыргызстан радиосунун эфиринде маек куруп жатып билдирди.
Анын айтымында, президент жана калаа мэринин тапшырмасы менен 2023-жылы бала бакчаларды курууга басым жасалууда.
"2023-жылдын аягына чейин Бишкекте 23 социалдык объектинин курулушу, капиталдык оңдоо жана реконструкциялоо иштери аяктайт. Учурда четинен колдонууга берилип жатат. Алардын ичинде 14 бала бакча, төрт мектеп, төрт фельдшердик-акушердик пункт жана бир мончо бар. Алсак, январда №8 бала бакчанын бир бөлүгү сейсмикалык талапка жооп бербегендиктен бузулуп, башка бөлүгү толук оӊдолуп тапшырылды. Бузулган жерге 90 орундуу бала бакча салынат, эски имараты да бузулат. Авариялык абалдагы №31 бала бакча да тизмеге алынып, 105 орундуу бала бакчаны салуу иштери 85 пайыз аяктап калды. "Ситун" заводунун ордуна салынган "Айдай" аталышындагы 130 орундуу бала бакча 1-июнда ишке берилди. Чоӊ-Арыктагы Самойленко көчөсүндөгү №26 бала бакчага кошумча 140 орундуу имарат курулуп башталды. Арча-Бешик конушундагы былтыр салынып баштаган 180 орундуу, Ак-Ордодо 280, Келечекте 100 жана Дордойдо 140 орундуу бала бакчанын куруу иштери жыйынтыкталып жатат. Ал эми Калыс-Ордодо, Көк-Жар (280 орун), Мурас-Ордо (320 орун), Ак-Босого (140 орун), Учкунда (140) бала бакча куруу иштери башталды. Калаанын түштүк тарабында салынчу үч мектептин инженердик тутумун мэрия орнотуп жатса, ал эми куруу иштерин Россия жүргүзөт. Андан тышкары, Ак-Батада 600 орундуу мектеп салынат. Калыс-Ордодо болсо кайрымдуулук фонд тарабынан мектеп тургузулат. Бишкектин Жибек Жолу проспектисиндеги социалдык мончонун ачылышы 1-сентябрга белгиленген. Мончодо жер астындагы унаа токтотуучу жай, ден соолугунан мүмкүнчүлүгү чектелген адамдар үчүн шарттар, бассейн, кафе жана балдар комплекси каралган. Ушундай эле мончо калк жыш жашаган конуштарда курулат. Курулуш аянтчалары мурдатан эле даярдалып бүткөн. Объектилер газ менен иштейт. Бул долбоорлор түтүн маселесин чечүүгө багытталган", — деди Молдобасаров.
Ал 2023-жылы №1 Үй-бүлөлүк дарыгерлер борборун куруу иштери толук бүткөрүлөрүн, №6 оорукананы Катар мамлекети куруп ишке берерин кошумчалады.