Күн ысыкта жүк ташыган унааларга жолдо жүрүүгө чектөө киргизилди. Бул тууралуу Сыргак Мусаев Sputnik Кыргызстан радиосуна маек куруп жатып билдирди.
Анын айтымында, чектөө жалпы пайдалануудагы жолдордун сакталышын камсыздоо жана колдонуунун мөөнөтүн узартуу максатында киргизилген.
"Автомобилдер жөнүндө" мыйзамдын 22-беренесинин 3-бөлүгүнүн негизинде 29-майда Транспорт жана коммуникациялар министрлигинин буйругу чыкты. Ага ылайык, 2023-жылы жайкысын жалпы пайдалануудагы жолдордо жүк ташуучу автотранспорт каражаттарынын кыймылына убактылуу чектөө киргизилди. Ал 1-июндан 1-сентябрга чейин саат 10:00дөн кечки 20:00гө чейин абанын табы 28 градустан жогору болгондо иштейт. Ошондой эле максималдуу салмак 18 тоннадан ашык транспортторго күн ысыкта жолдо жүрүүгө тыюу салынат. Ошол эле учурда жүргүнчү, гуманитардык жардам, кооптуу жана тез бузулуучу азыктарды ташыгандарга бул чектөө жайылтылбайт. Мындан тышкары, атайын уруксат кагазынын негизинде ири көлөмдө жүк ташыган жана жол куруу үчүн тартылган автоунаалар жүрө алат", — деди Мусаев.
Ошондой эле ал буйруктун аткарылышын транспортту көзөмөлдөөчү 20 пункт жана мобилдик топтор жүргүзө турганын кошумчалады.