БИШКЕК, 14-июн. — Sputnik. Республикада бензиндин баасын кымбаттатпай кармап турууга болбой баратат, июлда дагы үч сомго өсүшү мүмкүн. Бул тууралуу Нефтетрейдерлер ассоциациясынын жетекчиси Канат Эшатов Sputnik Кыргызстанга билдирди.
Анын айтымына караганда, күйүүчү жана майлоочу майдын кымбатташы Россиядагы кырдаалга, тагыраагы, ал жактагы мунай заттарынын каатчылыгына байланыштуу. Буга өндүрүүчү заводдордун чыгарган наркынын көтөрүлүшү да себепкер болууда.
"Биздин нефтетрейдерлер менен келишимге кол койгон беш заводдун экөө оңдоо иштеринен кийин жаңы гана ачылып, өндүрүштүк кубаттуулугун кеңейте элек. Дагы бири оңдоп-түзөөгө жабылды. Ошентип, бензиндин тартыштыгы жаралды. Азыр күйүүчү, майлоочу май болобу деген суроо башкы маселе болуп турат. Россиялык мунайды кайра иштетүүчү заводдордогу баа көтөрүлүп жатат, бирок биздин компаниялар мурда алгандары менен аралаштырып, андан соң орточо баасын чыгарган. Азыр бензиндин баасын кармап турууга мүмкүн эмес", — деген Эшатов.
Мындан бир нече күн мурда Россия бензиндин экспортун азайтып жатканы боюнча маалымат тараган.
Анда РФ продукцияны ички рынокко көбүрөөк чыгарып жатканы кабарланган.
"Аи-95 үлгүсүндөгү бензиндин биржадагы баасы өсүп жатканын рыноктук кырдаал катары түшүнүүгө болот. Анткени суроо-талап жогорулады", — деп айтылган анда.
Буга чейин "Коммерсант" гезити июндун алгачкы алты күнүндө майдын аягына салыштырмалуу бензиндин экспорту төрт эсеге, ал эми 2022-жылдын июнуна караганда эки эсе азайганын белгилеген.