БИШКЕК, 13-июн. — Sputnik. Куралдуу агрессия көрсөткөндөр болсо, анын кесепетинен жарандарыбыз курман болуп жатса, биз андайга жөн гана байкоо салып отура албайбыз. Кандай гана агрессор болбосун, тиешелүү жооп кайтарууга даярбыз. Бул туурасында президент Садыр Жапаров учурда өтүп жаткан Коопсуздук кеңешинин жыйынында айтты.
Эске салсак, жыйында Куралдуу күчтөрдүн абалы жана өнүгүү багыттары тууралуу маселелер каралды.
"Кандай гана чыр-чатак болбосун, аны алдын алууга же бир гана дипломатиялык жол менен чечүүгө болот деп эсептейм. Биз ички жана тышкы саясатта дал ушул принципти карманабыз. Ошол эле учурда бизге карата куралдуу агрессия көрсөткөндөр болсо, анын кесепетинен жарандарыбыз курман болуп жатса, үйлөрүбүз жана башка инфратүзүмдөрүбүз талкаланып өрттөлүп жатса, андайга жөн гана байкоо салып отура албайбыз. Биз кандай гана агрессор болбосун, тиешелүү жооп кайтарууга даярбыз", — деген Жапаров.
Президент, тилекке каршы, азыркы учурда дүйнө жүзүндө кыйын кырдаал түзүлүп, ал региондук эле эмес, глобалдык деңгээлде да тез өзгөрүп, аскердик-саясий аракеттер менен коштолуп жатканын белгилеген.
"Мунун баары аскердик жана мамлекеттик башкаруу системасын бекемдөө зарылдыгын эскертип, аскердик коркунучтар артып баратканынан кабар берет. Ага ылайык, аскердик коопсуздукту жана коргонууну камсыз кылууга мамлекеттик көз карашты кайра карап чыгууну талап кылууда", — деген мамлекеттин башчысы.
Ал өлкөнүн коргонуу жөндөмдүүлүгүн камсыз кылуу жаатындагы мамлекеттик саясатты ырааттуу жана так жүргүзүү мамлекетти тышкы коркунучтардан эле сактабастан, ички туруктуулукту чыңдай турганын, коомдук коопсуздукту жогорулатарын белгилеген.
"Кыргызстан өзүнүн саясатын кошуналар менен ынак мамиледе болуу принцибинде түзүп жаткан меймандос өлкө деп келебиз. Андыктан биз өзүбүздүн коргонуу жөндөмдүүлүгүбүздүн деңгээлин жогорулатууну унутпашыбыз керек", — деген Жапаров.