Президент Садыр Жапаров Баткенде Тажикстандын куралдуу кол салуусунда чек араны коргоп жатып жарадар болгондордун жаракаты жеңил болсо да компенсация берүү зарылдыгын айтты. Мындай маселе Коопсуздук кеңештин жыйыны учурунда көтөрүлдү.
Чек ара кызматынын башчысы Уларбек Шаршеев былтыркы каргашада каза болгон чек арачылардын үй-бүлөсүнө жана жаракат алгандарга каралган компенсация боюнча маалымат берген.
"Көз жумган 42 аскердин 37синин үй-бүлөсүнө компенсация төлөнгөн. Калган бешөөнүн документи туураланып жатат", — деген ал.
Ал эми жарадар болгондордун ичинен 10 аскерден башкасына тиешелүү төлөм берилген. Шаршеев муну 10 аскердин жаракаты жеңил болгону менен түшүндүрдү. Бирок президент Садыр Жапаров бул нерсе мыйзамда каралбаса башка булактардан каражат таап, аскерлерге компенсация берүү керектигин айтты.
"Жеңил жаракат алгандарга өзүнө тиешелүү жардамдарды көрсөтөлү, эгерде мыйзамда каралбаса, башка каржы булактардан таап берели. Анткени алар негизги күч келгенче төшүн тосуп, ошол жерде (Баткен - ред.) өлүм менен өмүрдүн ортосунда турушту да. Мамлекет үчүн, эл үчүн тикесинен тик тургандардан биз эч нерсени аябашыбыз керек. Биз чек арачыларыбыз мамлекетти коргоодо кандай мамиле кылса, биз аларга он эсе артык мамиле жасашыбыз керек. Ошондуктан сиз муну көңүлүңүзгө алыңыз. Тактап, мага маалымат менен киресиз", — деди Жапаров Чек ара кызматынын жетекчи Шаршеевге.
Тема боюнча: