БИШКЕК, 10-июн. – Sputnik. Кыргызстандын футбол командасы афганстандык каршылаштарын 1:0 эсеби менен жеңди.
Оюндун соңку мүнөттөрүндө чабуулчу Эрнис Батырканов афгандыктардын дарбазасына гол киргизди. Ошол учурда кызык окуя болду. Гол киргенден кийин афган оюнчулары финалдык ышкырыкты күтпөстөн талааны таштап чыгып кетишти (аларды машыктыруучусу алып кетти).
Алар муну менен өзбекстандык жана түркмөнстандык судьяларга каршылык көрсөткөндөй болушту. Афган тараптын ою боюнча, гол эрежелерди бузуу менен киргизилген. Бирок кайталап көрүүдө андай эмес экенине ынанууга болот.
Судьялар афган оюнчуларынын талаага кайтып келишин 10 мүнөттөй күтүштү. Бирок алар келбей койгонуна байланыштуу Борбор Азия футбол федерациясы жазалашы ыктымал.