БИШКЕК, 8-июн. — Sputnik. Вице-спикер Нурбек Сыдыгалиев президенттин кеңешчиси Чолпонбек Абыкеевди "төңкөрүш болсо депутаттар качып кетет" деп айтканы үчүн тилдеди.
Белгилей кетсек, тармактык комитетте "Элдик курултай жөнүндө" мыйзам долбоору каралып жатканда Абыкеев өлкөдө бир нерсе болуп кетсе депутаттар качып кетерин айтып, мындайда курултайчылар чогуларын билдирген.
"Президенттин жанында алдамчы, калпычы кишилер жүрбөшү керек. Анын жанында чындыкты бетке айткан адамдар жүрүшү зарыл. Сиз ушул жерде калп айтып отурасыз. 4-октябрда өзүңүз каякта жүрдүңүз эле? Сиз качып кетти деген 6-чакырылыштын депутаттары да ушул жерде отурат, бетине айтыңызчы. Айта албасаңыз мен айтып коёюн, башаламандыктан кийин 5-октябрда сүйлөшүүлөр жүрүп, 6-октябрда "Достук" мейманканасына чогулуп спикер Дастан Жумабеков арызын жазып кетип Мыктыбек Абдылдаевди шайлаганбыз", — деди Сыдыгалиев.
Ошондой эле ал премьер-министрдин отставкага кетүү арызын карап, ордуна Садыр Жапаровду бекитишкенин да эскертти.
"Депутаттар бир ай жок болуп кетти" деп ошондогу чечимдердин баары мыйзамсыз болду деп жатасызбы ошондо? Ар бир сөздү ойлонуп сүйлөш керек. Биз шайлап берген үчүн иштеп келе жатат. Бирөөгө жалаа жапканды токтотуңуздар", — деди вице-спикер.
Белгилей кетсек, Чолпонбек Абыкеев "Элдик курултай тууралуу" мыйзам долбоорун иштеп чыккан жумушчу топтун жетекчиси.