Кыздарды күйөөгө берерде себине китеп кошуп берүүнү салтка айлантуу зарыл. Мындай пикирин Гүлжигит Соронкулов Sputnik Кыргызстан радиосуна маек куруп жатып билдирди.
Анын айтымында, окумуштуу кандидаттык ишин жазуудагы изилдөөлөрүнө караганда кыргыз үй-бүлөлөрүндө үй китепканасы азайып кеткен.
"Мен кандидаттык ишимди жактап жатканда окурмандардын китепке болгон кызыгуусуна да токтолгон элем. Ошондо азыр кыргызда үй-бүлөлүк китепкана азайып кеткенин билдик. Бул байкалбаганы менен чоң трагедия. Анткени үйдө ата-энеси китеп окуганын көргөн баланын сөзсүз китепке кызыгуусу пайда болот. Андан китепти сүйгөн, окуган инсан калыптанат. Ал эми китеп тарбиянын башаты эмеспи. Ошондуктан биз, ата-энелер, кийинки муундун китеп окуган адам болуп чоңоюшуна шарт түзүшүбүз керек. Мисалы, кыздарды турмушка узатарда себине "Манас" баш болгон эпосторду, кенже эпосторду, элдик чыгармаларды кошуп берсек. Эркек балдар үйлөнгөндө да ушундай эле классикалык китептерди тартууласак. Бул ошол жаңы түзүлгөн үй-бүлөдө ардактуу жерден орун алып, алардын наристелери үчүн зор инвестиция болмок", — деди Соронкулов.
Окумуштуу балдарды китеп дүйнөсүнө кызыктырарда жомокторго басым жасоо керектигин кошумчалады.