БИШКЕК, 6-июн. — Sputnik. Кадамжай районундагы (Баткен облусу) Өрүкзар айылында Hyundai Porter автоунаасынын үстүнө түшүп бара жаткан 9-класстын бир нече окуучусу кырсыктап, экөө реанимацияга түшкөн. Машинаны класс жетекчиси айдап бара жаткан. Бул туурасында Билим берүү жана илим министрлигинин маалымат кызматынан кабарлашты.
Автокырсык 1-июнда болгон.
Hyundai Porter автоунаасынын ичинде Өрүкзар орто мектебинин 9-классынын окуучулары жана класс жетекчилери болгон. Окуучулар мектепте класс жетекчилери Г.Закирова, А.Үрүстөм кызы менен биргеликте виньеткага сүрөткө түшкөн. Андан кийин кечке маал, саат 18:30да Өрүкзар айылынын спорт аянтчасына барып сүрөткө түшүүнү чечишкен.
"Hyundai Porter автоунаасынын үстүнө 25 окуучу чыккан. Автоунааны класс жетекчилердин бири А.Үрүстөм кызы айдап бара жаткан. Жолдо автоунаанын борту (тосмосу) сынып кетип, окуучулар жерге кулаган", — деп айтылат маалыматта.
Кырсыктан улам тогуз окуучу Кадамжай райондук жалпы дарыгерлер практикалык борборуна жеткирилип, медициналык текшерүүдөн өткөрүлгөн. Алардын ичинен эки окуучу кыз жандандыруу бөлүмүнө жаткырылган.
Учурда кыздардын абалы жакшы экени, бүгүн томографиялык текшерүүдөн өтөрүн билдиришти.
Бул окуя боюнча милиция тергөө иштерин баштаган. Анын жыйынтыгына жараша мектептин администрациясына жана класс жетекчилерге тиешелүү чаралар көрүлөрү айтылды.