БИШКЕК, 5-июн. — Sputnik. Кытайдын коргоо министри Ли Шанфу Кытай менен АКШнын ортосундагы каршылашуу жалпы дүйнө жүзү үчүн "талкалай турган чатакка" айланарын билдирди.
Жыл сайын өтүүчү коопсуздук боюнча азиялык саммитте министрдин айткандарын Reuters агенттиги билдирди.
"Кытай менен АКШнын ортосундагы олуттуу каршылашуу дүйнө жүзү үчүн болуп көрбөгөн кырсыкка айланарын танууга болбойт", — деген Ли Шанфу.
Министр эки мамлекеттин ортосунда көп нерседен айырмачылыктар арбын болсо да, Кытай Америка Кошмо Штаттары менен тирешүүнү эмес, кепке келип, диалог курууну каалаарын белгилеген.
Буга чейин Тайвань кысыгында аскердик кемелердин чатагы болгон. Кытайдын деңиздеги аскердик күчтөрү катуу ылдамдык менен келип, америкалык эсминецке 137 метр жакындап, кооптуу маневр жасаган.