БИШКЕК, 5-июн. — Sputnik. Сууга болгон тарифти жогорулатуу зарылдыгынын себебин мэрдин орун басары Жыргалбек Шамыралиев түшүндүрүп берди.
Ал Sputnik Кыргызстандын маалымат борборунда өткөн "Бишкекте суунун тартыштыгы. Мончолор менен автоунаа жуучу жайлар качан ачылат?" аттуу брифингге катышты.
"Сууну колдонуу нормадан ашып кеткен, бирок бүгүндөн тарта сууну рационалдуу колдонсок дефицитти жоюуга болот. Сууну ар бир үйгө жеткирүүнүн чыгымы чоң, электр энергияга, жумушчуларга айлык (18ден 20 миңге чейин) төлөш керек. Эмгек акысын жөнгө салбасак адистер иштен кетет. Эң башкысы — биз Советтер Союзунан бери келе жаткан түтүктөрдү дайыма оңдоп, профилактикалык иштерди жүргүзүп турушубуз керек", — деди Шамыралиев.
Ал шаардын ар бир жашоочусун сууну сарамжалдуу колдонууга чакырды.
Бишкекте суу тартыштыгы күчөдү. Жеке турак жайлардын жашоочулары таза сууну огородду сугарууга колдонушат. Мэриядан белгилегендей, бул нерсе сууну колдонуу нормасын кыйла жогорулатат. Бир адамга 170 литр суу туура келсе, жайында 500 литрге чейин чыгат. Суу менен камсыздоо системасынын начарлашына калктын өсүшү дагы себеп болууда. Бишкекте рейд жүрүп, жеке мончолор, бассейндер, автоунаа жуучу жайлар убактылуу жабылып жатат.